Lam 5 | ZomZIV | STEP | TOPA aw, ko tunga thupiang sate phawk inla hong en-in ka maimawlnate uh hong mu in.

Lamentations 5

1 TOPA aw, ko tunga thupiang sate phawk inla hong en-in
ka maimawlnate uh hong mu in.
2 Ka luah ka ngakte uh pemtate tungah tung khin a,
ka innte uh gamdang mite in tang uh hi.
3 Kote tagah le pa nei lo, ka suak uh a,
ka nute uh meigong a bang uh hi.
4 Ka dawn ding uh tuisik ka lei uh kul a,
ka cih ding uh sing lei a kul hi. ^a
5 Ko hong nungdelhte in hong khetul suih uh a,
khawl thei loin gimin ka sibup uh hi. ^b
6 Anlum ka kham uh ka ngah nadingun
Egypt-te le Assyria-te tungah ka ki-ap uh hi. ^c
7 Ka pate un mawhna bawlin amaute lah om nawn lo uh a,
amaute thuak ding dan kote in ka thuak uh hi. ^d
8 Silate in ko hong uk uh a, ^e
amau khut pan hong suaktasak ding kuamah a om kei hi. ^f
9 Gam sunga namsaute hangin
ka nuntakna uh khamin ka anlum ding uh ka ngah uh hi.
10 Ka vun uh meikhuk bangin sa a,
gilkialin ka nattun uh hi; ^g
11 Zion a nupite le Judah khuapite a
nungak bitte hong kibuansak hi. ^h
12 Kumpi tapate a khutun kiduangkhai a,
upate a kizahtak nawn kei hi.
13 Tangvalte in angawina suangin an gawi uh a,
sing gik pipi pua-in naupangte a genthei uh hi.
14 Khuapi kongpi ah upate a om nawn kei uh hi;
khangnote in tumtheihte a tum nawn kei uh hi. ⁱ
15 Ka lungsim uah lungnopna beita hi;
ka lamna uh thumna a suak zo hi. ^j
16 Ka kumpi lukhu uh ka lu panun kiakhia ta hi. ^k
Mawh khin ka hi manun gimna ka thuak uh hi! ^l
17 Hih thu hangin ka lungtang uh zawm a, ^m
hih nate hangin ka mit uh a mial hi; ⁿ
18 ahang in, Zion Mual gamsimtham suak a, ^o
se-alte a vak kawikawi hi.
19 TOPA aw, nang na uk tawntung hi;
khang khat pan khang khat dongin na kumpi tokhom a kip den hi.
20 Bang dinga kote hong mangngilh den na hi hiam?
Bang dingin tu tanvei hong pampaih na hi hiam?
21 TOPA aw, kong kihei theih nadingun kote ka ngei uh hong bangsak in;
a beisa hunte bangin ka tulai nite uh hong bawlthaksak in;
22 tua hi loin, kote hong ma takpi-a ^p
ko tungah heh lua mahmah na hi hiam? ^q